हङकङ । एसियाकै प्रमुख वित्तीय संस्था एचएसबीसी (HSBC) ले हङकङमा आर्टिफिसियल इन्टेलिजन्स (एआई) तथा उदीयमान प्रविधि संस्थान (AI and Emerging Technology Institute) स्थापना गर्ने घोषणा गरेको छ। हङकङ फिनटेक हप्ताका अवसरमा आयोजित कार्यक्रममा बोल्दै एचएसबीसीका मुख्य कार्यकारी अधिकृत (सिइओ) जोर्जेस एल्हेडेरीले सन् २०२७ को पहिलो त्रैमासिकसम्ममा उक्त एआई संस्थान सञ्चालनमा ल्याइने लक्ष्य राखिएको जानकारी दिनुभयो। यसअघि नै सिङ्गापुरमा एआई केन्द्र स्थापना गरिसकेको बैंकले हङकङ युनिभर्सिटी अफ साइन्स एन्ड टेक्नोलोजीलाई आफ्नो मुख्य प्राज्ञिक साझेदार बनाएर काम अघि बढाउने जनाएको छ। मुख्य भूमि चीनसँग जोडिएको हङकङको मेगा प्रोजेक्ट ‘नर्दन मेट्रोपोलिस’ मा पूर्वाधार तयार हुनासाथ यो संस्थानलाई त्यहीँ स्थानान्तरण गरिने योजना बैंकको रहेको छ।

विश्वभरका Citi, Standard Chartered र Barclays जस्ता प्रमुख बैंकिङ समूहहरूले एआई प्रविधिको विस्तारसँगै हजारौँ कर्मचारी कटौती गरिरहेको समयमा एचएसबीसीले भने एआई रूपान्तरणमा लगानी तीव्र बनाएको छ। हङकङमा मात्रै २८ हजार र विश्वभर करिब २ लाख कर्मचारी रहेको एचएसबीसीले आफ्ना सम्पूर्ण जनशक्तिलाई एआईसम्बन्धी उच्चस्तरीय तालिम दिन सुरु गरेको सिइओ एल्हेडेरीले स्पष्ट पार्नुभयो। एआईले वित्तीय क्षेत्रका जागिरहरूलाई रूपान्तरण गर्ने भएकाले प्रविधिसँगै कर्मचारीको क्षमता विकास आवश्यक रहेको बैंकको ठम्याइ छ। हङकङको केन्द्रीय बैंक (HKMA) का अनुसार हाल हङकङका ८० प्रतिशतभन्दा बढी बैंकहरूले एआई तथा जेनेरेटिभ एआई प्रविधि अपनाइसकेका छन्।

यसैबिच, हङकङको मौद्रिक प्राधिकरण (HKMA) ले वित्तीय क्षेत्रमा एआई एजेन्टहरूको प्रयोगलाई प्रवर्धन गर्न र यससँगै जोडिएका जोखिमहरू व्यवस्थापन गर्न ‘प्रोजेक्ट सेज’ (Project SAGE) सुरु गर्ने घोषणा गरेको छ। HKMA का मुख्य कार्यकारी एड्डी युका अनुसार एआई एजेन्टहरूको परीक्षण, जबाफदेहिता, केन्द्रीय रजिष्ट्रार स्थापना र ‘नो योर एजेन्ट’ (KYA) मापदण्ड निर्धारणका लागि अन्तर-क्षेत्रीय विशेषज्ञ प्यानल गठन गरिनेछ। नवप्रवर्तन र जोखिम व्यवस्थापन सँगसँगै जानुपर्नेमा जोड दिँदै प्राधिकरणले टोकनाइज्ड एक्सचेन्ज फन्ड बिलहरूको परीक्षण विस्तार गर्ने र नियमित स्टेबलकोइनलाई भुक्तानीको माध्यमका रूपमा प्रयोग गर्न सकिने विषयमा अध्ययन भइरहेको जनाएको छ।