कोभिड महामारीबाट जोगिन भक्तपुरमा व्यावसायिक र सामाजिक संघसंस्थाहरूको सक्रियता बढेको छ। स्वास्थ्य सुरक्षाको मापदण्ड पालना गर्दै भौतिक उपस्थितिलाई न्यूनीकरण गरी सक्रियता बढाएको हो। कोभिड संक्रमणको दोस्रो लहर रोकथाम र नियन्त्रणको लागि सिंगो राष्ट्र लागिपरेको बखत सामाजिक उत्तरदायित्व बहन गरी भक्तपुरका संस्थाहरूले विभिन्न खाले सेवा उपलब्ध गराएका छन्।

भक्तपुर चेम्बर अफ कमर्स तथा भक्तपुर लायन्स सेवा समन्वय समितिको संयोजनमा ११ वटा संस्थाहरूले संयुक्त रूपमा कोभिड– १९ विरुद्ध अभियानै चलाएका हुन्।
‘सेवा परमो धर्म अभियानअन्तर्गत कोभिडसँग लड्छौं। हामी सेवा दिन्छौं। नारा दिएर कोभिडविरुद्धको संघर्षमा छौं।’ नेपाल चेम्बर अफ कमर्सका केन्द्रीय सदस्य (भौतिक पूर्वाधार सभापति) तथा भक्तपुर लायन्स सेवा समन्वय समितिका सेक्रेटरी रोशन भोयद्योले बताए। विश्वभर फैलिएको कोभिडलाई परास्त गर्ने अभियानमा जोडिन उहाँले सर्वसाधारणमा अपिलसमेत गरे।
कोभिड संक्रमितहरूको उपचारमा संलग्न चिकित्सक तथा स्वास्थ्य परिचारिकाहरूको लागि जेठ १७ देखि विशेष किसिमको क्वारेन्टिन सेन्टर सञ्चालनमा आउने भोयद्योले जनाए। त्यस्तै जेठको तेस्रो हप्तादेखि अक्सिजन सिलिन्डर उपलब्ध गराउने तयारी भइरहेको छ।

अभियानले चाँगुनारायण नगरपालिकाद्वारा सञ्चालित कोभिड– १९ आइसोलेसन सेन्टर नेकसँग सहकार्य गरेको छ। संक्रमण नियन्त्रणको सवालमा आइसोलेसन सेन्टरलाई थप प्रभावकारी बनाउन आवश्यक व्यवस्थापन गरिएको भक्तपुर चेम्बर अफ कमर्सका अध्यक्ष तथा भक्तपुर विद्युतीय सामग्री व्यवसायी संघका संस्थापक अध्यक्ष न्हुछेरत्न मानन्धरले जनाए। परमो धर्म अभियानले जेठको पहिलो हप्तादेखि भक्तपुरमा कोभिड बिरामीको लागि चौबिसै घण्टा निःशुल्क एम्बुलेन्स सेवा सञ्चालनमा ल्याएको छ। त्यसको लागि हटलाइन नं. ९८६१७५६४६१ सार्वजनिक गरिएको छ।

त्यस्तै, भक्तपुर जिल्ला प्याब्सनका वरिष्ठ उपाध्यक्ष तथा चेम्बरका सचिव सुरेन्द्र श्रेष्ठले मनोचिकित्सक डा. कञ्चन दाहाल र वरिष्ठ कार्डियोलोजिस्ट डा. सञ्जय श्रेष्ठसँग भच्र्युअल अन्तरक्रिया कार्यक्रम सम्पन्न गरेको जनाए। सचेतना तथा परामर्श कार्यक्रम नियमित रूपमा प्रत्येक साता दुईवटा आयोजना गरिने उहाँले बताए। सो कार्यक्रममार्फत संक्रमण सम्बन्धीको सचेतना, सतर्कता र अपनाउनुपर्ने सुरक्षाको विषयमा जानकारी लिन सकिने उहाँले दाबी गरे। चिकित्सकसँग परामर्श लिनको लागि बिहान ७ देखि ९ बजेसम्म सम्पर्क गर्न सकिनेगरी ९७४२८८२९६२, ९७४२८८२९६३ र ९७४२८८२९६४ हटलाइन नम्बरहरू सार्वजनिक गरिएको छ।

कोभिड संक्रमणको दोस्रो लहर रोकथाम र नियन्त्रणको लागि सिंगो राष्ट्र लागिपरेको बखत सामाजिक उत्तरदायित्व बहन गरी भक्तपुरका संस्थाहरूले विभिन्न खाले सेवा उपलब्ध गराएका छन्।
त्यस्तै, भक्तपुर लायन्स सेवा समन्वय समिति, समितिमा आबद्ध क्लब तथा मनकारी व्यक्तिहरूले भक्तपुर नगरपालिकाले सुरु गर्ने अक्सिजन प्लान्टको लागि तीन लाख रुपैयाँ सहयोग गरेको समितिका संरक्षक तथा पूर्वडिस्ट्रिक्ट गभर्नर कृष्णप्रसाद अवालले जनाए। आगामी दिनमा चिकित्सक, स्वास्थ्यकर्मीलगायतको टिमबाट घरघरमै पुगेर पीसीआर परीक्षण, रगत जाँच तथा आवश्यक परामर्श सेवा उपलब्ध हुने लायन्स सेवा समन्वय समितिका अध्यक्ष विष्णुभक्त मारिखुंले बताए। सुरक्षित तबरले उपलब्ध हुने ‘डोर टु डोर हेल्थ सर्भिस’ले भक्तपुरवासी लाभान्वित हुने मारिखुंले दाबी गरे।
‘मलगायतको १६ जना चिकित्सकीय टिम तयार छौं। थप केही संख्यामा स्वास्थ्य परिचारिकाहरू पनि सोही टिममा संलग्न हुनेछन् र प्रत्येक दिन दुईजना चिकित्सकबाट निःशुल्क परामर्श उपलब्ध गराउनको लागि सामाजिक सञ्जालमार्फत सम्पर्क नम्बर सार्वजनिक गर्दैछौं।’ भक्तपुर डक्टर्स सोसाइटीका अध्यक्ष डा. पुण्यराम खर्बुजाले जनाए।

कोभिडविरुद्धको संयुक्त सेवा अभियानमा भक्तपुर जिल्ला प्याब्सन, भक्तपुर विद्युतीय सामग्री व्यवसायी संघ, भक्तपुर डक्टर्स सोसाइटी, नेपाल नर्सिङ संघ, सीबीआर, भक्तपुर हार्ट एन्ड डायबेटिज सेन्टर, निरोग मेडिकल केयर एट होम, भक्तपुर पार्टी प्यालेस तथा क्याटरिङ संघ र त्रिनेत्र बचत तथा ऋण सहकारी संस्थाहरूले संस्थागत सहकार्य गरेका छन्। त्यस्तै नेपाल नर्सिङ संघका केन्द्रीय सदस्य हरिप्रसाद कोजू र लायन्स ३२५ ए २ का रिजन चियर पर्सन रञ्जित मारिखुं यस अभियानमा सक्रिय सहभागी छन्।

उसो त कोरोना सुरु हुनुअघि नै निजी कम्पनीहरूमा सामाजिक उत्तरदायित्वको चेतना बढेकै थियो। तर, औद्योगिक व्यवसाय ऐन, २०७३ र औद्योगिक व्यवसाय नियमावली, २०७६ लागू भएयता विभिन्न संघसंस्थाले ‘सीएसआर’ कार्यक्रमअन्तर्गत अन्य समयमा भन्दा अहिले तुलनात्मक रूपमा बढी मात्रामा सेवा दिएका छन्।

कोरोनाले निम्त्याएको समस्या र चुनौती सामना गर्न सरकार एक्लैको सामथ्र्यमा नागरिक र निजी क्षेत्रले सहकार्य गर्नु स्वागतयोग्य छ। स्वास्थ्य संकटको बीचमा विभिन्न संघसंस्थाले जनचेतना फैलाउने, स्वास्थ्य सामग्रीको वितरण, परामर्श सेवा, आपूर्ति तथा अन्य सेवाजन्य कार्यले गर्दा सामूहिक रूपमा कोरोनालाई परास्त गर्नेमा सहयोग मिल्नेछ।