१० असोज, तेह्रथुम। कृषकलाई कृषि क्षेत्रमा सहयोग पुर्याउने उद्देश्यले तेह्रथुमको म्याङलुङमा आइतबार ‘कृषि ज्ञान केन्द्र’ स्थापना गरिएको छ । साबिकको जिल्ला कृषि विकास कार्यालयमा नयाँ नामसहित स्थापना गरिएको ज्ञान केन्द्रको प्रदेश नं १ का कृषिमन्त्री भलकबहादुर मगरले उद्घाटन गरे । सो अवसरमा उहाँले नयाँ सोचका साथ अगाडि बढी किसानका समस्या समाधानमा अग्रसर रहन कर्मचारीलाई निर्देशन दिए ।
मन्त्रालयले ज्ञान केन्द्रलाई आवश्यक सहयोग गर्ने र ज्ञान केन्द्रले किसानलाई सहयोग गर्नुपर्ने भन्दै मन्त्री मगरले केन्द्र, प्रदेश र स्थानीय तहसँगको सहकार्यमा पहिलेभन्दा बढी व्यवस्थित ढङ्गले तेह्रथुमका किसानले समयमै मलखाद्य, सेवासुविधा पाउनुपर्ने बताए ।
मन्त्रालयले प्रदेशभित्रका सबै जिल्लामा कृषि ज्ञान केन्द्र स्थापना गरी कृषकलाई सहज पहुँचको व्यवस्था गरेको मन्त्री मगरले बताए । उनले कार्यालय स्थापना हुँदा केन्द्र सरकारको अधिकार प्रदेश सरकारमा आएको र प्रदेश सरकारले स्थानीय तहको कामलाई समेत सहयोग पुर्याउने बताए ।
स्थानीय तह भएसँगै धनकुटामा रहेको कृषि ज्ञान केन्द्रले तेह्रथुमलाई पनि हेर्ने गरेको थियो । जसबाट गर्दा कृषकहरुलाई सानो काममा पनि धनकुटा जानुपर्ने बाध्यता रहेको थियो । अब त्यो बाध्यता हटेको र कृषकलाई काम गर्न सहज भएको अगुवा कृषक योगेन्द्र गड्तौलाले बताए ।
