२८ असोज, पोखरा। पोखरामा शुक्रबारदेखि सुरु हुने नवौँ राष्ट्रिय खेलकुद प्रतियोगिता २०७९ का लागि औषधिसहित एक सय आठ स्वास्थ्यकर्मी परिचालन हुने भएका छन् ।
राष्ट्रिय खेलकूद परिषद् नवौँ राष्ट्रिय खेलकूद प्रतियोगिता अन्तर्गत गठित स्वास्थ्य उपसमितिका संयोजक प्रा डा बुलन्द थापाले स्वास्थ्य उपसमितिले आफ्नो काम प्रतियोगिता सुरु भएका दिनदेखि नै थालिसकेको जानकारी दिए ।
औपचारिकरुपमा शुक्रबार उपराष्ट्रपति नन्दबहादुर पुनले खेलको शुभारम्भ गर्ने भए पनि केही खेल भने पाँच दिनदेखि नै सुरु भएका छन् । डा थापाका अनुसार पोखरा रङ्गशाला तथा वरवरका खेल मैदानमा हुने प्रतियोगितामा सहभागी खेलाडी, अफिसियल कर्मचारी, प्रशिक्षक तथा रेफ्रीको औषधि उपचारमा चिकित्सकसहित एक सय आठ जना स्वास्थ्यकर्मीको समूह खटिएको छ भने १६ वटा एम्बुलेन्स तयारी अवस्थामा राखिएका छन् ।
यसै प्रतियोगिताअन्तर्गत कास्कीबाहेक अन्य जिल्ला स्याङ्जा, पर्वत, म्याग्दी, गोरखा, तनहुँ , बागलुङ, नवलपुरमा खेलाइने खेलमा औषधि, स्वास्थ्यकर्मी र एम्बुलेन्सको व्यवस्था भइसकेको जानकारी स्वास्थ्य उपसमितिका सचिव दोबे तामाङले दिए । बाहिरी जिल्लामा खेलअगावै स्वास्थ्य उपचारको व्यवस्था स्वास्थ्य उपसमितिले मिलाइसकेको जानकारी सचिव तामाङले दिए ।
प्रतियोगिता भइरहेका अवस्थामा खेलाडी तथा अन्य व्यक्ति घाइते वा बिरामी भएमा उनीहरुको पहिलो उपचार खेल मैदानमा, मैदानमा सम्भव नहुने उपचार पोखरा रङ्गशालाभित्र नै स्थापना गरिएको स्वास्थ्य केन्द्रमा गरिने जानकारी डा थापाले दिए ।
स्वास्थ्य केन्द्रमा पनि उपचार सम्भव नभएका खण्डमा घाइतेको उपचार गर्न पोखराका चार वटा अस्पताल पश्चिमाञ्चल क्षेत्रीय अस्पताल, गण्डकी मेडिकल कलेज, मेट्रो सिटी अस्पताल र अन्नपूर्ण अस्पतालमा उपचारका लागि सम्झौता गरिएको छ । ती अस्पतालमा पनि उपचार सम्भव नभएको खण्डमा घाइते वा बिरामी खेलाडी तथा अफिसियल कर्मचारीलाई हेलिकप्टरमार्फत काठमाडौँका सुविधा सम्पन्न अस्पतालमा उपचारका लागि लाने व्यवस्थासम्म स्वास्थ्य उपसमितिले गरेको जानकारी डा थापाले दिए ।
