जापानबाट आएर सिकलसेलको अध्ययन गर्दै डा. नाकामुरा
शिक्षाखबर डेस्क
५ चैत्र २०७९, आईतवार
no immg

५ चैत, काठमाडाैँ । जापानी नागरिक डा. युका नाकामुराले थारू समुदायमा लाग्ने सिकलसेल एनिमिया रोगको अध्ययन गर्न थालेकी छ ।

दाङ तुलसीपुरमै मधुमेह रोगबारे ‘शोधपत्र’ गरेर विद्यावारिधि पूरा गरेकी उनले सिकलसेलबारे अनुसन्धान गर्न थालेकी हुन् ।

४ वर्षअघि तुलसीपुर आउँदा उनले थारू समुदायमा मात्रै लाग्ने सिकलसेल रोगबारे जानकारी पाएको जनाउँदै त्यसमा पनि आफूले अध्ययन गर्न थालेको बताइन् । ‘मैले ४ वर्षअघि दाङको तुलसीपुरमै मधुमेह रोगका बारेमा अनुसन्धान गरेर विद्यावारिधि गरेकी छु,’ नेपाली भाषामा डा. नाकामुराले भनिन्, ‘मैले थारू समुदायमा मात्रै लाग्ने सिकलसेल एनिमियाबारे जानकारी पाएँ, अहिले यसकै रिसर्च गरिरहेकी छु ।’

उनी ४ वर्षअघि तुलसीपुर आएर करीब ३ महिना तुलसीपुर बसेकी थिइन् । त्यतिबेला सिकलसेलबारे केही अध्ययन गर्न पाएको उनले बताइन् । बीचमा पनि नेपाल आएर त्यो रोगबारे अध्ययन गर्ने योजना रहे पनि कोभिडले गर्दा आउन नपाएको बताइन् ।

अहिले उनी १ हप्ताका लागि पुनः नेपाल आएकी छन् । उनी १ हप्तासम्म दाङसहित बाँके, बर्दिया, कैलाली, कञ्चनपुर, रुपन्देही, कपिलवस्तु लगायतका जिल्लाका सिकलसेल एनिमिया पीडितसँग भेटघाट गर्नेछिन् । त्यसपछि पुनः जापान फर्किने उनले बताइन् ।

आगामी असारमा पनि पुनः नेपाल आएर बिरामीसँग भेटघाट गर्ने बताइन् ।

डा. नाकामुरालाई थारू स्वास्थ्यकर्मी समाजका केन्द्रीय अध्यक्ष जीवराज चौधरी लगायतले स्वागत गरेकी थिइन् । त्यस अवसरमा अध्यक्ष चौधरीले सरकारले नै यो रोगका विषयमा चासो नदेखाएको अवस्थामा जापानी नागरिकले अध्ययन, अनुसन्धान गर्नु आफ्ना लागि ठूलो सहयोग रहेको बताए । उनले सरकारी अध्ययनअनुसार नेपालमा ११.३ प्रतिशत थारू समुदायमा यो रोग लाग्ने गरेको तथ्यांक रहे पनि पूर्णरूपमा थारू समुदायमा सिकलसेल परीक्षण नहुँदा त्यसले आधिकारिकता पाउन नसकेको भन्दै सबै थारू समुदायमा सिकलसेल एनिमिया जाँच हुनुपर्ने बताए ।

सिकलसेल एनिमियाबाट धेरै जनाको मृत्यु भइसकेको र केहीले उपचारमा २० लाख रुपैयाँभन्दा पनि बढी खर्च गरिसकेको बताए । यस्तो रोगको उपचारका लागि अहिलेसम्म नेपालमा अस्पताल समेत स्थापना हुन नसकेको बताए । आफूहरूले बाँकेको नेपालगञ्जमा सिकलसेल एनिमिया अस्पताल तथा अनुसन्धान केन्द्र स्थापना गरेको भए पनि त्यसमा राज्यले उचित तरिकाले हेर्न नसकेको दुःखेसो पोखे । डा. नाकामुराले सोही अस्पतालका लागि १ लाख सहयोग गरेकी छन् ।

प्रतिक्रिया