हेटौँडा / मकवानपुरको हेटौँडा उपमहानगरपालिकाले युवा पुस्तालाई आधुनिक तथा उत्पादनमुखी कृषिमा आकर्षित गर्ने दीर्घकालीन लक्ष्यसहित विशेष स्वरोजगार कार्यक्रम सञ्चालनमा ल्याएको छ। उपमहानगरपालिकाले कृषि उत्पादन वृद्धि र आयआर्जनलाई केन्द्रमा राख्दै सिँचाइ सुविधाको विस्तार, माटोको गुणस्तर सुधार र आयातित बीउको निर्भरता घटाउन स्वदेशी बीउ उत्पादनलाई मुख्य प्राथमिकतामा राखेको हो। उपमहानगरपालिकाका उपप्रमुख राजेश बानियाँले अघिल्लो आर्थिक वर्षको समग्र प्रगति समीक्षा तथा आगामी आर्थिक वर्ष २०८३/८४ को बजेट प्रस्तुत गर्दै नगर क्षेत्रभित्र कृषि क्षेत्रको दिगो विकासका लागि नयाँ पुस्तालाई प्रत्यक्ष रूपमा उत्पादनमुखी कृषिसँग आबद्ध गराउने ठोस नीति लिइएको विस्तृत जानकारी दिनुभयो।
बजेटमा माटोको स्वास्थ्य सुधार कार्यक्रमलाई विशेष महत्त्व दिँदै नगर क्षेत्रका विभिन्न कृषि फर्महरूको माटोको नमूना परीक्षण कार्य सम्पन्न गरिएको छ। सोही प्रयोगशाला परीक्षणका आधारमा माटोको बिग्रँदो अम्लीयपन घटाउनका लागि कृषकहरूलाई ५० प्रतिशत अनुदानमा कृषि चुन वितरण गरिएको छ भने वाग्मती प्रदेश माटो तथा मल परीक्षण प्रयोगशालाको प्राविधिक सहयोगमा थप ४० मेट्रिक टन चुन पूर्ण रूपमा निःशुल्क वितरण गरिएको उपप्रमुख बानियाँले स्पष्ट पार्नुभयो। यसका साथै तरकारी तथा फलफूल उत्पादन विस्तारका लागि कृषक समूह तथा स्थानीय कृषि सहकारीहरूसँगको प्रत्यक्ष साझेदारीमा लिची, केरा, ड्रागन फल र एभोकाडोलगायतका बहुमूल्य फलफूल खेती विस्तार गर्ने विशेष कार्यक्रम हाल नगरका पाँच वटा विभिन्न स्थानमा सफलतापूर्वक सञ्चालन भइरहेको जनाइएको छ। उपमहानगरपालिकाले खेतीयोग्य जमिनमा बाह्रै महिना सिँचाइ सुविधा विस्तार गर्न तथा विद्यमान सिँचाइ पूर्वाधारहरूको तत्काल मर्मत सम्भार गर्नका लागिसमेत बजेटमा आवश्यक रकम विनियोजन गरेको छ।
नेपालमा आयातित तथा हाइब्रिड बीउमा बढ्दै गएको परनिर्भरतालाई क्रमशः न्यूनीकरण गर्दै लैजान उपमहानगरपालिकाले स्वदेशी खुला सेचित जातका मकै र धानको रैथाने बीउ उत्पादनलाई उच्च प्रोत्साहन गर्ने नीति लिएको छ। यस गौरवशाली योजनाअन्तर्गत रामपुर कम्पोजिट मकै ७५० कट्ठा, मकवानपुर–१ धान १५ कट्ठा र राम धान १० कट्ठा क्षेत्रफलमा व्यावसायिक रूपमा बीउ उत्पादन गरिने भएको छ। यसैगरी, सङ्घीय सरकारबाट हस्तान्तरित भई आएको धान पकेट कार्यक्रमअन्तर्गत हेटौँडा उपमहानगरपालिका वडा नं १७ मा श्री साना किसान कृषि सहकारी संस्थामार्फत तीन सय कट्ठा क्षेत्रफलमा वृहत् धानखेती कार्यक्रमसमेत उत्साहजनक रूपमा सञ्चालन भइरहेको उपप्रमुख बानियाँले जानकारी दिनुभयो।
