काठमाडौँ / हङकङ टेलिकम्युनिकेशन (HKT) ले हङकङमा पहिलो पटक आर्टिफिसियल इन्टेलिजेन्स (AI) डाटा सेन्टर इन्टरकनेक्ट (DCI) सुपरहाइवे सेवा सञ्चालनमा ल्याउने घोषणा गरेको छ। ग्लोबल एआई प्रतिस्पर्धामा अन्य विकसित मुलुकहरूसँग जोडिन हङकङ सरकारले एआई क्षेत्र र पूर्वाधार निर्माणमा तीव्र गतिमा लगानी बढाउँदै लगेको छ। साउथ चाइना मर्निङ पोस्टका अनुसार हङकङ सरकारले हालैका वर्षहरूमा एआई पूर्वाधार निर्माणमा अर्बौँ लगानी गरिसकेको छ, जसमध्ये ३६४ मिलियन अमेरिकी डलर (२.८४ बिलियन हङकङ डलर) लगानीमा सेमिकन्डक्टर केन्द्र निर्माणसमेत समावेश छ।

एचकेटीको यो नयाँ एआई सुपरहाइवे सेवाले ३.२ टिबिपिएस (Tbps) को उच्च गति र न्यूनतम विलम्बता (Ultra-low latency) प्रदान गर्दछ। एचकेटीका फिक्स्ड नेटवर्क इन्जिनियरिङ प्रमुख र फाइबर लिङ्क ग्लोबलका सीईओ रिकी क्वाङका अनुसार, यस्ता पहलहरू मार्फत एचकेटीले हङकङको आई एन्ड टी (Innovation and Technology) इकोसिस्टमलाई आगामी वर्षहरूका लागि बलियो आधार प्रदान गरिरहेको छ। एचकेटी कमर्सियल ग्रुपका प्रबन्ध निर्देशक स्टिभ एनजीले कनेक्टिभिटीलाई हङकङको एआई भविष्यको महत्त्वपूर्ण जगका रूपमा चित्रण गर्दै यो परियोजनाले ‘उत्तरी महानगर’ (Northern Metropolis) को महत्त्वपूर्ण आधार तयार गर्ने र हेटाओ क्षेत्रलाई हङकङका विद्यमान डाटा सेन्टरहरूसँग जोड्ने बताउनुभयो।

३.२ टिबिपिएस क्षमताको यो एआई डिसीआई सुपरहाइवेले एड्भान्स उद्योग मापदण्डहरू जस्तै ‘रिमोट डाइरेक्ट मेमोरी एक्सेस’ (RDMA) लाई समर्थन गर्दछ र एआई पूर्वाधार प्रदायकहरूलाई बहुविध डाटा सेन्टरहरूमा कम्प्युटिङ स्रोतहरूसम्म द्रुत पहुँच सुनिश्चित गर्दछ। हङकङ सरकारले स्यान्डी रिजमा विशाल डाटा सेन्टर निर्माण गर्न ११ हेक्टर जग्गा उपलब्ध गराएको र सन् २०३२ सम्म हङकङको कम्प्युटिङ पावर ३६ गुणाले बढाउने योजना बनाएको पृष्ठभूमिमा यो कनेक्टिभिटी सेवा अत्यन्त महत्त्वपूर्ण हुनेछ। एचकेटीले लोक मा चाउ लुप र सुङ क्वान ओ को बिचमा अत्याधुनिक ‘हलो कोर फाइबर’ (Hollow core fibre) प्रयोग गर्ने योजना बनाएको छ, जसले परम्परागत फाइबरको तुलनामा करिब ३० प्रतिशत कम विलम्बता हासिल गर्नेछ र यसले हजारौँ GPU हरूलाई एकसाथ काम गर्न सहज बनाउनेछ।