काठमाडौँ / अविरल वर्षा, बाढी र पहिरोका कारण देशका विभिन्न प्रदेश र उपत्यका जोड्ने प्रमुख राजमार्गहरू नराम्ररी प्रभावित भएका छन् । नेपाल प्रहरीले साउन २ गते राति २१:३० बजेसम्मको अद्यावधिक विवरण सार्वजनिक गर्दै कोशी, बागमती, गण्डकी, लुम्बिनी प्रदेश तथा काठमाडौँ उपत्यकाका मुख्य सडक खण्डहरूमा पूर्ण तथा एकतर्फी अवरोध सृजना भएको जनाएको छ । जसअनुसार कोशी प्रदेशको भोजपुर जिल्लास्थित मध्य पहाडी लोकमार्गको बोखिम खण्ड बाढीका कारण साउन १२ गतेदेखि नै एकतर्फी मात्र सुचारु रहेको छ भने इलामको मेची राजमार्ग अन्तर्गत राजदुवाली (झापा देखि ताप्लेजुङ सडक) खण्ड साउन २३ गतेदेखि पहिरोका कारण पूर्ण रूपमा अवरुद्ध बनेको छ । इलाममा अर्को वैकल्पिक बाटो उपलब्ध भए पनि यातायात सेवा सहज हुन सकेको छैन ।

यसैगरी बागमती प्रदेशका मुख्य राजमार्गहरूमा सम्भावित जोखिमलाई मध्यनजर गर्दै प्रशासनले कडा कदम चालेको छ । काभ्रेको बि.पि. राजमार्ग अन्तर्गत खुर्कोट-नेपालथोक-कटुन्जेबेंसी खण्डमा चल्ने सम्पूर्ण सवारी साधनहरूलाई साउन २२ गते बेलुका १८:०० बजेदेखि अर्को दिन बिहान ०४:०० बजेसम्मका लागि सञ्चालनमा रोक लगाइएको छ । मकवानपुरको कान्तिलोकपथ अन्तर्गत हेटौँडा-ठिंगन-बागमती-ललितपुर खण्डमा पनि सम्भावित बाढी र पहिरोको उच्च जोखिमका कारण अर्को सूचना नभएसम्मका लागि सवारी साधन सञ्चालनमा पूर्ण रोक लगाइएको प्रहरीले जनाएको छ । सिन्धुपाल्चोकको अरनिको राजमार्ग अन्तर्गत भोटेकोशी गाउँपालिकाको जिरोकिलो र कोदारी खण्डमा साउन ३१ र साउन १ गते आएको पहिरोका कारण सडक पूर्ण रूपमा अवरुद्ध छ भने रसुवाको पासाङ ल्हामु सडक खण्ड अन्तर्गत गोसाइकुण्ड गाउँपालिकाको बोकेझुन्डामा साउन २ गते बिहान आएको पहिरोले यातायात पूर्ण रूपमा ठप्प पारेको छ ।

गण्डकी र लुम्बिनी प्रदेशका पहाडी जिल्लाहरूमा पनि पहिरोको प्रकोप उस्तै रहेको छ । गण्डकी प्रदेशको बागलुङस्थित कालीगण्डकी करिडोर सडक खण्डको बेलबगर (मुस्ताङ जाने बाटो) साउन १ गतेदेखि नै पहिरोका कारण पूर्ण रूपमा अवरुद्ध रहेको छ । लुम्बिनी प्रदेशको अर्घाखाँचीस्थित सालझन्डि ढोरपाटन सडक खण्डको ढुङ्गेखोला (बागलुङ, रुकुम, गुल्मी जाने बाटो) साउन २८ गतेदेखि र गुल्मीको वामी रिडी सडक खण्ड अन्तर्गत चौरहाकोट गाउँपालिकाको तल्लाफाँटमा साउन २ गते दिउँसो आएको पहिरोका कारण यातायात सेवा पूर्ण रूपमा अवरुद्ध बनेको छ । यता काठमाडौँ उपत्यकाको ललितपुर जिल्लास्थित कान्ति लोकपथको बागमती गाउँपालिका वडा नं. ०३ भालुखोलामा साउन २ गते दिउँसो १६:०० बजे आएको पहिरोले सडक पूर्ण रूपमा अवरुद्ध पारेको छ । प्रहरीले यी जोखिमपूर्ण सडक खण्डहरूमा यात्रा गर्दा विशेष सावधानी अपनाउन र वैकल्पिक मार्गहरूको प्रयोग गर्न आम सर्वसाधारणलाई अपिल गरेको छ ।