वासिङ्टन डीसी / प्रमुख अमेरिकी चिप निर्माता कम्पनी एएमडी (AMD) ले प्रसिद्ध एआई अनुसन्धान तथा विकास कम्पनी एन्थ्रोपिक (Anthropic) मा ५ अर्ब अमेरिकी डलरसम्म लगानी गर्ने सहमति जनाएको छ। दशौँ अर्ब डलर बराबरको एआई पूर्वाधार तथा प्रणालीलाई समेट्ने यस रणनीतिक सम्झौताअन्तर्गत एन्थ्रोपिकले एएमडीको इन्स्टिंक्ट एमआई४५० (Instinct MI450) सिरिजका एक्सेलेरेटरहरू प्रयोग गरी दुई गिगावाट (२,००० मेगावाट) सम्मको कम्प्युटिङ क्षमता विस्तार गर्नेछ। सम्झौता अनुसार पहिलो गिगावाट क्षमताको पूर्वाधार जडान सन् २०२७ को पहिलो छिमैकमै सुरु हुनेछ। एएमडीको लगानी एन्थ्रोपिकले हासिल गर्ने पूर्वाधार निर्माणका निश्चित माइलस्टोनहरूसँग जोडिएको छ।

यस बहुआयामिक सम्झौताले एएमडीको इक्विटी प्रतिबद्धता र एन्थ्रोपिकको तर्फबाट हुने ठुलो हार्डवेयर खरिद अर्डरलाई आपसमा जोडेको छ। एन्थ्रोपिकले एएमडीको हेलियोस (Helios) सिस्टम प्रयोग गर्नेछ, जसमा एमआई४५५एक्स (MI455X) जिपियु, एपिक ‘वेनिस’ प्रोसेसर, पेन्सान्डो नेटवर्किङ र आरओसीएम (ROCm) सफ्टवेयर समावेश छन्। एएमडीकी अध्यक्ष तथा मुख्य कार्यकारी अधिकृत (CEO) लिसा सुले यस साझेदारीले एन्थ्रोपिकको नेतृत्वदायी एआई क्षमता र एएमडीको उच्च कार्यक्षमताको कम्प्युटिङलाई एकै ठाउँमा ल्याउने बताउनुभएको छ। एएमडीले यसअघि ओपनएआई (OpenAI) र मेटा (Meta) सँग पनि ६-६ गिगावाट क्षमताका पूर्वाधार र सेयर सम्झौता गरिसकेको छ।

एन्थ्रोपिकका सह-संस्थापक तथा मुख्य कम्प्युट अधिकारी टम ब्राउनका अनुसार बहुविध हार्डवेयरको प्रयोगले विभिन्न एआई कार्यहरूका लागि उपयुक्त प्रणाली चयन गर्न सहज हुनेछ। यस सम्झौताअन्तर्गत दुवै कम्पनीबिच बहुवर्षीय इन्जिनियरिङ कार्यक्रमसमेत सञ्चालन हुनेछ, जसअन्तर्गत क्लोड (Claude) एआईको प्रयोग गरी एएमडीका चिपहरू र आरओसीएम सफ्टवेयर प्लेटफर्मलाई थप अप्टिमाइज गरिनेछ। अमेजन, गुगल, र स्पेसएक्सको कोलोसस (Colossus) सुविधाबाट पनि कम्प्युटिङ क्षमता सुरक्षित गरिरहेको एन्थ्रोपिकका लागि एएमडीसँगको यो सहकार्यले आफ्नो लोकप्रिय एआई मोडल ‘क्लोड’ को विकास र सञ्चालनलाई नयाँ उचाइ दिने अपेक्षा गरिएको छ।