वीरगन्ज / वीरगन्जस्थित नारायणी अस्पतालको आकस्मिक कक्षमा कार्यरत मेडिकल अफिसर डा. प्रमोद राममाथि साङ्घातिक आक्रमण भएपछि नेपाल चिकित्सक सङ्घले गम्भीर आपत्ति जनाउँदै दोषीहरूमाथि कडा कारबाहीको माग गरेको छ। सङ्घले आइतबार एक विज्ञप्ति जारी गर्दै डा. राममाथि शनिबार बेलुका करिब ४० देखि ५० जनाको समूहले मरणासन्न हुने गरी आक्रमण गरेको घटनाको तीव्र भर्त्सना र भर्त्सना व्यक्त गरेको छ। शनिबार बिहान अस्पतालको आकस्मिक कक्षमा भर्ना गरिएका मुटुसम्बन्धी समस्या भएका बिरामीको विषयलाई लिएर घटनाको यथार्थ नबुझी समूहमा आएका व्यक्तिहरूले अस्पतालभित्र तोडफोड गरी आतङ्क सिर्जना गरेको र सोही क्रममा कार्यरत चिकित्सकमाथि कुटपिट गरेको सङ्घले जनाएको छ।

स्वास्थ्य संस्थाजस्तो अत्यन्तै संवेदनशील क्षेत्रलाई आतङ्कित पार्ने र सेवा प्रवाहमा बाधा पुर्‍याउने नियतले गरिएको यस प्रकारको आपराधिक घटनामा संलग्न व्यक्तिहरूलाई अविलम्ब पक्राउ गरी कानुनी दायरामा ल्याउन सङ्घले सरकारसँग जोडदार माग गरेको छ। चिकित्सक तथा स्वास्थ्यकर्मीहरूमाथि शृङ्खलाबद्ध रूपमा भइरहेका यस्ता साङ्घातिक हमलाहरूले कार्यक्षेत्रमा मनोबल गिराएको भन्दै सङ्घले अस्पतालहरूमा सुरक्षित र भयरहित वातावरणमा स्वास्थ्य सेवा प्रवाह गर्ने व्यवस्था मिलाउन नेपाल सरकार, गृह मन्त्रालय र स्थानीय प्रशासनको गम्भीर ध्यानाकर्षण गराएको छ।