१३ भदाै, एजेन्सी। भिक्टोरियाले १० हजार भन्दा बढी विद्यार्थीहरूलाई नर्सिङ वा मिडवाइफरी स्नातक अध्ययन गराउने भएको छ।
भिक्टोरिया सरकारले २७ करोड डलरको नयाँ योजना अन्तर्गत ठूलो संख्यामा विद्यार्थीहरूलाई निः शुल्क नर्सिङ वा मिडवाइफरी स्नातक अध्ययन गराउने भएको हो।
राज्यको समस्याग्रस्त स्वास्थ्य प्रणालीमा दबाब कम गर्ने प्रयासमा भिक्टोरियन सरकारले १७ हजार भन्दा बढी नर्स र मिडवाइफहरू भर्ती गर्ने र तालिम दिने भएको छ।
भिक्टोरियन प्रिमियर डेनियल एन्ड्रयूजले २०२३ र २०२४ मा नर्सिङ वा मिडवाइफरी कोर्समा भर्ना हुने सबै नयाँ आन्तरिक विद्यार्थीहरूले पाठ्यक्रम लागतहरू कभर गर्न छात्रवृत्ति पाउने बताएका छन्।
सरकारको यस पाँच वर्ष कार्यक्रम अन्तर्गत विद्यार्थीहरूले अध्ययन गर्दा ९ हजार डलर र बाँकी ७ हजार ५ सय डलर उनीहरूले भिक्टोरियका सार्वजनिक स्वास्थ्य सेवाका क्षेत्रमा दुई वर्षसम्म काम गरेको अवस्थामा पाउने बताइएको छ।
‘यदि तपाइँ १२ वर्षमा हुनुहुन्छ र तपाइँ नर्सिङ वा मिडवाइफरी अध्ययन गर्ने बारे सोच्दै हुनुहुन्छ भने जानुहोस्। हामीले तपाईंको उच्च शिक्षा योगदान कार्यक्रम (एचइसिएस) शुल्कहरू तिर्नेछौं।’ प्रिमियर एन्ड्रयूजले भनेका छन्। ‘यो एक नर्स बन्नको राम्रो समय हो। यो एक महत्वपूर्ण कदम र अभूतपूर्व लगानी हो ।’
स्नातकोत्तर नर्सहरूलाई गहन हेरचाह, आपतकालीन, बालरोग र क्यान्सर हेरचाह सहित विशेषज्ञ क्षेत्रहरूमा अध्ययन पूरा गर्न १० हजार डलर छात्रवृत्ति पनि प्रदान गरिने बताइएको छ।
एन्ड्रयूजका अनुसार यो लगानीले स्वास्थ्य प्रणालीमा भइरहेको अहिलेको दबाब कम गर्न मद्दत गर्नेछ।
‘देशको हरेक स्वास्थ्य प्रणाली महामारीका कारण ठूलो दबाबमा छ।,’ उनले भने, ‘हाम्रा मेहनती कर्मचारीहरूलाई समर्थन गर्न हामीले गर्न सक्ने सबैभन्दा राम्रो कुरा भनेको उनीहरूलाई थप समर्थन दिनु हो। त्यसैले यो प्याकेजले पहिलेभन्दा धेरै नर्सहरूलाई भर्ति गरेर तालिम दिनेछ ।’
यो प्याकेज अहिले भिक्टोरियाका आन्तरिक विद्यार्थीहरूका लागि मात्रै भएको बताइएको छ। विदेशी विद्यार्थीहरू यो योजनामा नपर्ने संकेत देखिएको छ।
