काठमाडौँ / नेपाल सरकारको नेतृत्व तथा संयुक्त राष्ट्रसङ्घको सहकार्यमा आगामी तीन वर्षका लागि ‘संयुक्त राष्ट्र मानसिक स्वास्थ्य सहयोग कार्यक्रम’ औपचारिक रूपमा शुभारम्भ गरिएको छ। यो कार्यक्रमले नेपालको मानसिक स्वास्थ्य प्रणालीलाई थप सुदृढ र दिगो बनाउने, नागरिकहरूलाई गुणस्तरीय मानसिक स्वास्थ्य सेवामा सहज पहुँच पुर्याउने, र देशव्यापी रूपमा मानसिक स्वास्थ्यसम्बन्धी दक्ष जनशक्तिको क्षमता अभिवृद्धि गर्ने प्रमुख लक्ष्य राखेको छ। नेपालस्थित स्विस दूतावासको आर्थिक सहयोगमा सञ्चालन हुने यस कार्यक्रमको प्रत्यक्ष कार्यान्वयन भने कर्णाली, मधेश र लुम्बिनी प्रदेशमा विशेष रूपमा केन्द्रित रहनेछ।
कार्यक्रमले मानसिक स्वास्थ्यसम्बन्धी सुशासन तथा नीतिगत संरचनालाई मजबुत बनाउनुका साथै डिजिटल र टेलि–मानसिक स्वास्थ्य सेवाका नवीन अभ्यासहरूलाई तल्लो तहसम्म विस्तार गर्ने लक्ष्य लिएको छ। स्वास्थ्य तथा खाद्य स्वच्छता मन्त्रालयको नेतृत्वमा संयुक्त राष्ट्र जनसङ्ख्या कोष (UNFPA), युनिसेफ नेपाल (UNICEF) र विश्व स्वास्थ्य सङ्गठन नेपाल (WHO) ले संयुक्त रूपमा यो कार्यक्रमको कार्यान्वयन गर्नेछन्। यसका साथै मानसिक स्वास्थ्य सेवामा प्रभावकारी सार्वजनिक–निजी साझेदारी स्थापना गरी राष्ट्रिय स्तरमा दीर्घकालीन प्रणालीगत परिवर्तन ल्याउने अपेक्षा गरिएको छ।
सरकार र संयुक्त राष्ट्रसङ्घका निकायहरूले यस कार्यक्रमको सफल सञ्चालनबाट नेपालमा मानसिक स्वास्थ्य सेवा प्रणालीलाई थप प्रभावकारी, समावेशी, र दिगो बनाउन ऐतिहासिक योगदान पुग्ने विश्वास व्यक्त गरेका छन्।
