नवलपरासी (बर्दघाट–सुस्ता पश्चिम) । आर्थिक अभावका कारण उच्च तथा प्राविधिक शिक्षा हासिल गर्न समस्या भोगिरहेका विपन्न तथा जेहेन्दार विद्यार्थीहरूलाई लक्षित गरी नवलपरासी (बर्दघाट–सुस्ता पश्चिम) को बर्दघाट नगरपालिकाले विशेष छात्रवृत्ति रकम वितरण गरेको छ। नगरपालिकाले माध्यमिक तहदेखि विश्वविद्यालय र चिकित्सा शास्त्र (एमबीबीएस) सम्म अध्ययनरत २८ जना छनोट भएका विद्यार्थीहरूलाई कुल ७ लाख रुपियाँ बराबरको छात्रवृत्ति रकम हस्तान्तरण गरेको हो। छात्रवृत्तिका लागि प्राप्त ८९ वटा आवेदनहरूमध्ये तोकिएको कार्यविधि र मापदण्डका आधारमा निष्पक्ष रूपमा छानिएका विद्यार्थीहरूलाई न्यूनतम १२ हजारदेखि अधिकतम ५५ हजार रुपियाँसम्म नगद छात्रवृत्ति प्रदान गरिएको नगरपालिकाले जनाएको छ।

कमजोर आर्थिक अवस्थाका कारण कुनै पनि प्रतिभावान विद्यार्थी गुणस्तरीय शिक्षाबाट वञ्चित हुन नपरोस् भन्ने मूल उद्देश्यका साथ स्थानीय सरकारले यो कार्यक्रम सञ्चालन गरेको बर्दघाट नगरपालिकाका नगर प्रमुख शम्भुलाल श्रेष्ठले बताउनुभयो। शिक्षा क्षेत्र व्यक्तिको उज्ज्वल भविष्यको आधार मात्र नभई सिङ्गो समाज र नगर रूपान्तरणको मुख्य मेरुदण्ड भएकाले विपन्न, सीमान्तकृत तथा जेहेन्दार विद्यार्थीहरूको शैक्षिक यात्रालाई निर्बाध अगाडि बढाउनु स्थानीय सरकारको प्राथमिक दायित्व रहेको नगर प्रमुख श्रेष्ठको भनाइ छ। यसैगरी नगरपालिकाका प्रमुख प्रशासकीय अधिकृत ऋषिराम भुसालले छात्रवृत्ति छनोट प्रक्रियालाई पूर्ण रूपमा पारदर्शी, वस्तुनिष्ठ र निष्पक्ष बनाइएको उल्लेख गर्दै माध्यमिक तहदेखि एमबीबीएस जस्तो पहुँचयोग्य हुन कठिन मानिने उच्च प्राविधिक विधासम्मका विद्यार्थीलाई समेट्दा यसले नगरको समग्र शैक्षिक गुणस्तर र दक्ष जनशक्ति निर्माणमा दीर्घकालीन योगदान पुर्‍याउने विश्वास व्यक्त गर्नुभयो।

नगरपालिकाका शिक्षा अधिकृत डिल्लीराम ढुङ्गानाले स्थानीय सरकारको यस प्रोत्साहन कदमले विद्यार्थीहरूलाई उच्च तथा प्राविधिक शिक्षा हासिल गर्न ठुलो हौसला मिल्नुका साथै नगरभित्र समतामूलक शैक्षिक अवसरको विस्तारमा महत्त्वपूर्ण भूमिका खेल्ने स्पष्ट पार्नुभयो। स्थानीय तहले आफ्नो बजेटमार्फत विपन्न तथा जेहेन्दार बालबालिकाका लागि चिकित्सा शिक्षासम्म वित्तीय सहयोग पुर्‍याउने यो प्रयासलाई अभिभावक र विद्यार्थीहरूले उच्च प्रशंसा गरेका छन्।